評價兩極的軒尼詩
David Li灣仔係港島第二大商業中心，當中最熱鬧的街道，軒尼詩道無出其右。軒尼詩道東起銅鑼灣怡和街崇光百貨，西至金鐘道警察總部，沿路商行及酒店林立，電車及地鐵亦在此通過，係港島交通命脈。軒尼詩道係填海而成，係海旁東填海計劃重要一環。有趣的是，填海之時港督軒尼詩早已離任，而佢亦非促成填海的人，點解會由與填海計劃無關的軒尼詩命名軒尼詩道，背後有一段故事。
以軒尼詩命名灣仔主要幹道，最大原因係軒尼詩對華人的貢獻。耐人尋味的是，軒尼詩雖然受華人歡迎，卻未有如其他港督般離任不久就有以自己命名的街道，直至軒尼詩離任 47 年後，軒尼詩道才出現。這與軒尼詩於華人及洋人間評價兩極有關。愛爾蘭出生的軒尼詩以對殖民地當地居民友善及注重福利聞名，擔任下議院議員時曾訂定濟貧法，為英國福利制度打下基礎。來港赴任前， 軒尼詩曾經任巴巴多斯、巴哈馬、塞拉利昂及納閩總督，軒尼詩不問宗教背景任命當地土著擔任高級官員，並且改革稅制獄政以及公共衛生服務，令佢深受當地民眾歡迎，但大刀寬斧的改革不只令佢同其他官員有摩擦，亦令洋人對佢有意見。這一評價，持續到軒尼詩在香港任內。
軒尼詩於 1877 年來港任職，一如佢過往作風，佢貫徹對當地居民友善的政策。當時，華人仍未被允許歸化英籍，未能享有完整公民權益，為提升華人地位，軒尼詩允許華人歸化英籍，成為正式英國公民，自此可以如同其他歐裔公民一樣有平等地位，更能享有政治權利。軒尼詩委任伍廷芳出任定例局議員，開創香港華人參政先河，自此定例局設有華人擔任的議席。當然，要成為英國公民，就必須要有良好英文水平，為加強華人英語程度，佢將英文列作必修課，增加英文教學時數，更規定新成立的學校要以英語教學，才可得到政府資助。軒尼詩允許華人於中環購地起屋及經營生意，使得華人商行於中環湧現，促進中環急速發展。有見當時拐賣婦孺猖獗，軒尼詩責成巡理府 (Police Magistrates)、警察隊長 (Captain Superintendent of Police) 以及漢務參贊 (Chinese Secretary) 成立委員會，同請願查緝拐匪的華商領袖協商籌辦保良局，並由軒尼詩親自核閱，上報倫敦藩政院 (Colonial Office) 取得批准。由於軒尼詩積極協助保良局之成立，令佢廣受華人歡迎。不過，以上政策，令佢受到唔少洋人不滿，因為華人地位提升以及在中環營商，會令本來有獨特優勢的英商失勢，軒尼詩減少笞刑的政策，更令洋人擔心廣東犯罪分子會紛紛來到刑罰寬鬆的香港，影響治安。軒尼詩本人容易激動，曾因懷疑妻子同最高法院法官希剌 (Thomas Child Hayllar) 有染而同對方大打出手，更令佢成為上流社會同洋人間的笑柄。如此負面的評價，令軒尼詩離任後，洋人拒絕以佢命名街道。雖然 軒尼詩在各殖民地受盡洋人批評，但軒尼詩嘅政治生涯十分長久，香港總督任期結束後，軒尼詩被派往毛里裘斯擔任最後一次殖民地總督。1890年返回英國再次成為下議院議員，直至1891年離世。
一直要到半世紀後，相隔多年，物是人非，香港洋人對佢亦不再如過去反感。隨着香港華人人口增加，灣仔人口壓力大增，當年港督寶靈提出的灣仔填海計劃再被提出，海旁東填海計劃於是應運而生。本來，皇家海軍因不願搬走位於現今律敦治醫院位置的海軍醫院，反對灣仔填海，但行政立法兩會非官守議員遮打全力爭取填海，使得議案獲得通過，海軍醫院亦只得搬去昂船洲，以便填海。到 1929 年，灣仔填海工程完成之時，華人已經有相當影響力，為紀念曾經力爭華人權益的軒尼詩，連接灣仔同銅鑼灣的海旁大道便命名為軒尼詩道。軒尼詩道落成後，吸引唔少華人商行進駐，繁盛非常，直到現在。
